DOLE-7 niluwat na ug stoppage order batok sa gitukod nga mall, human ni-collapse ang crane niini; 4 ka balay natagakan, 1 ang angol.

30
Niluwat na ug stoppage order ang Department of Labor and Employment (DOLE)-7 batok sa City Mall project nga nahimutang sa Natalio Bacalso Ave., dakbayan sa Sugbo.

Giklaro hinoon ni Luchel Taniza, information officer sa DOLE-7 nga ang stoppage order, igo lang magpugong sa kontraktor sa gitukod nga mall, sa paggamit sa ilang mga heavy equipments.

Tungod niini, magpadayon lang gihapon ang pag-trabaho sa mao nga building.

Kahinumduman nga pasado alas-8:00 sa gabie sa adlaw nga Miyerkules, ni-collapse ang crane nga gigamit sa construction site ug upat ka mga panimalay ang natagakan niini.

Atol sa insidente naangol si Elenita Navasca, 32-anyos, kinsa nakaangkon ug samad sa iyang tuhod diin dali kining gidala sa Cebu City Medical Center.

Lakip sa mga kalapasan nga nakit-an sa DOLE-7 mao ang kakuwang ug dokumento sa kontraktor, sama sa construction and safety program samtang nahatag ra hinoon ang tanang benepisyo sa mga empleyado niini.

Karong adlaw nga Lunes, gikatakda nga ipatawag sa ahensiya ang kontraktor niini aron sa pagpahigayon og mandatory conference.


Facebook Comments