Pagadian City – Gisugdan na karong adlawa sa Department of Health ( DOH-Zamboanga del Sur) kauban ang mga barangay health workers ang door-to-door nga pagbakuna sa mga bata nga nag-edad unom (6) hangtud 59 ka bulan aron pakigbatukan ang pagsaka sa kasong tipdas sa probinsya.
Matud pa kang Health Education and Promotion Officer Dahlia M. Aseniero, libre ang measles vaccination nga ilang ihatag sa mga kabataan sugod Mayo 9 hangtud Hunyo 8 ning tuiga.
Gidugang pa niya nga nisaka ang kaso sa tipdas sa ikatulong quarter niadtong tuig 2017 rason nga gihimo ang aktibidad aron nga mapugngan gilayon ang nagpadayon nga pagkatag ug makontrola ang tipdas virus sa probinsya.
Nasayran kang Aseniero nga mukabat sa 165 ang kaso sa tipdas sa tibuok probinsya ug pito niini ang kompirmado.
Gipahibalo usab sa departamento sa panglawas nga ang sintomas measles virus mao ang rashes, ubo, runny nose, pagpula sa mata ug kalintura.
Mamahimong hinungdan kini sa pneumonia, pagkabuta ug kamatayon.
