Davao City – Gumikan sa pagdagsa sa dagku ug gagmay nga mga negosyo, mas milobo ang populasyon sa siyudad sa Dabaw.
Usa sa nakadaghan sa mga tawo karon sa dakbayan mao ang mga trabahante ug mga estudyante nga nanarbaho ug nagtungha sa siyudad gawas sa mga natawo gyod dinhi sa atong dapit.
Gumikan sa paglobo sa populasyon nagsulputon sab ang mga dormitory, apartment, boarding house, inn, hotel, ug daghan pang uban nga mitubag sa mga tawo nga nangita og mapuy-an.
Si Atty. Archie Albao, NBI Regional Director, nagpahimangno sa mga nanag-iya sa nasangpit nga mga establisemento nga usa ka krimen ang pagbutang og camera sa kwarto o sa C.R. man.
Suma ni Albao nga ubos sa Republic Act 9995, ang bisan kinsang indibidwal nga magmuntar og camera aron makuhaan og hulagway ang pribado nga parte nga walay pagtugot sa babaye usa ka krimen.
Segun ni Albao, ang bisan kinsang mahukmang guilty sa korte puwede mapreso gikan tulo ngadto sa pito ka tuig ug dugang ang multa nga gikan 100 hangtud 500 mil pesos.
Gipasabot sa Director nga napanday ang nasambit nga balaod tuig 2009 nunot sa kontrobersiyal nga isyu nga gilambigit sa sikat nga doktor nga si Hayden Kho.
Si Hayden Kho gitanggalan og lisensiya sa Professional Regulation Commission sa pagka-doktor gumikan sa pagbutang og sekreto nga camera aron makuhaan ang sexual activity uban sa iyang mga partner sama ni Katrina Halili.
Apan dili pa makasulti si NBI Director Atty. Archie Albao kung aduna bay liabilities ang tag-iya sa ladies dormitory nga nasakpan nga nagbutang og camera sa mga kwarto ug sa mga C.R.
Sanglit gikinahanglan ang mas lalom nga imbestigasyon aron mahibaloan kun kinsa ang suspek nga sikreto nagbutang og camera nga adunay SD card sa mga bombelya sa mga kwarto ug mga C.R. sa dormitory.
Tambag na lang ni Albao mga mangabang ug labaw na sa kababainhan nga una hingpit mu-estar gikinahanglan susihon og maayo ang matag suok aron masigurong walay camera nga naka-instalar.
RadyoMaN Joel Viray
