El opisina del Department of Tourism o DOT aqui na rehion nueve junto con el govierno local ya man launch con el programa el ” Mi Ciudad, Limpio y Floriao” na paseo del mar ayer Octubre 9..
Asegun con el Regional Director del DOT Butch Blanco, el objeto de este programa amo para revivi con el ciudad de Zamboanga como un limpio ciudad y igual antes conosido como el ciudad de flores.
Si Blanco ya habla, makatriste uwi cay el otro maga ciudad como el Baguio, Davao y otro pa ta nombra ya ahora como el ciudad de flores mientras el ciudad de Zamboanga que amo el antes mas conosido como ciudad de flores perdido ya. Pormedio de este programa ay conose otraves con el ciudad de Zamboanga como el ciudad de flores y limpio.
Por su parte el alcalde Beng Climaco Salazar ya dale coraje con el maga vivientes del ciudad para acustumbra siembra flores particular el flores de bougainvilla y ayuda ase limpio con el ciudad.
Mientrastanto, ayer durante el programa ya atende maga estudiante de diferentes escuela aqui na ciudad, pulis, militar y otro sector. despues del programa ya chene Zumba dance party como uno del maga programa del alcalde Climaco para chene buen salud. Hermie Ventura
