Ang kanhi chairman sa barangay Pagatpat nga si Achilles Jude Babaran kinsa giakusahan ug rape sa usa ka batan-ong babaye niadtong 2016 ang nasentensyahan karon ug double life imprisonment sa regional court.
Sa hukom ni Judge Jose Escobido sa branch 38 sa Regional Trial Court, gipakanaog niini ang duha ka life imprisonment batok kang babaran sa tag-isa ka counts sa rape sa namatay ng biktima sulod sa Sogo hotel niadtong 2016.
Gimandoan usab si Babaran nga mobayab ngadto sa pamilya sa biktima ug salapi nga mokabat ngadto sa P450 thousand pesos gumikan sa nahitabo sa ilang pamilya.
Kini nga kaso ang gumikan sa rape sa usa ka 15 anyos nga batang babaye nga si Nephi Loyola, usa ka youth leader sa Barangay Pagatpat niadtong June 19, 2015 ug Sept. 22, 2015.
Kahinumduman nga niadtong 2016, ang pamilya Loyola miakusar kang Babaran ug gibutyag pa ang pangalan sa biktima. Nahitabo kini gumikan usab sa brutal nga pagkamatay sa biktima niadtong panahona sulod sa Sogo hotel sa mag Barangay Lapasan niadtong July 12, 2016.
Matud pa sa abogado ni Babaran nga mag-andam na sila ug motion for reconsideration ug ang korte na ang bahala niini samtang nagpadayon nga nagtingkagol si Babaran sa city jail sa Lumbia.
