Gitin-aw ni DPWH XI Spokesperson Dean Ortiz nga dili ilahang proyekto ang padayon nga gitrabaho nga kalan sa isig ka-kilid sa dalan sa maong dapit apan iya sa Apo Agua.
Matud ni Ortiz nga ang Apo Agua ang padayon dunay ginahimong proyekto nga maoy nahimong hinungdan sa lawom nga pagbaha panahon magbundak ang uwan sa dakbayan sa Dabaw.
Gisusi sa news team niadtong Sabado sa hapon ang lugar aron unta ma-istorya ang nangulo sa proyekto apan wala kini matsansahi. Namatikdan ang gilubong nga duha ka pipeline kolor blue nga daw agianan og suplay sa tubig.
Kahinumdoman, niadtong Biyernes sa gabii daghan nangatanggong nga mga motorista tungod dili na makalabang paingon pasaka sa Jehovah Witnesses Conference Hall tungod pag-ubos palang sa Buhangin PNP nagsugod na ang baha ug pag-abot sa may Caltex lalom na kini alang sa lowered nga mga sakyanan sama sa kotse ug motor diin niabot og pila ka oras ang pagkatanggong sa mga motorista adiser sila naka-uli sa tagsa-tagsa nila ka mga pinuy-anan.
Gipaningkamotan sab sa news team nga makuha ang side sa Apo Agua aron ilang ma-isplikar ang hinungdan ngano dugay kaayo nakumpleto ang ilang proyekto nga naghatag na og kahasol sa publiko tungod sa pagbaha panahon mag-uwan ug grabeng abog panahon mag-init ang panahon sa siyodad.
RadyoMaN Joel Viray
