Indi pwede gamiton bilang filling materials sa Iloilo River Esplanade 6 ang coal ash halin sa coal fired sang Panay Energy Development Corporation (PEDC) sa brgy. Ingore, La Paz, Iloilo City.
Suno kay Engr. Mavi Gustilo, Project Engineer sang DPWH Region 6, may mga heavy metals nga lakip sa coal ash kaangay sang arsenic, cadmium kag mercury nga dilikado sa ikaayong lawas sang tawo kag ecosystem.
Natukiban nga may request ang hauler nga si Cesar Rey Sancho, tag-iya sang Sancho-Lavilla Builders Incorporated sa Environmental Management Bureau 6 (EMB) nga napetsahan July 24, 2017 sa diin ini ang gin-aprubahan man ni anay EMB Regional Director sang July 31, 2017.
Base sa request ni Sancho, 80,000 cubic meters nga coal ash ang iya gamiton bilang filling materials sa Esplanade Project.
Nagabalor P110,000,000 ang Slope Protection Project sa Espalande 6 sa diin ang Roprim Condtruction ni Mr. Ronnie Premailon ang contractor.
Magluwas diri, aprubado man ni Gloria ang tag-100,000 cubic meters nga coal ash bilang filling materials sa pribado nga mga proyekto nga ginalakipan sang Jollibee Commissary sa Lapayon, Leganes, Sta Lucia Realty Project sa Metropolis, Jaro, kag Dan Lamparero Project sa Tacas, Jaro.
Natukiban ang pangtambak sa Iloilo River Esplanade 6 gamit ang coal ash matapos naula ang karga nga abo sang truck sang hauler nga si Sancho sa brgy. Alalasan, La Paz sang Pebrero 8, 2018.
