Davao City – Gitin-aw karon sa Department of Public Works and Highways (DPWH-XI) Davao Region nga dili nila mapatuman ang usaka government building project kung kulang sa building permit requirements.
Gibutyag ni DPWH-XI Spokesperson Dean Ortiz nga dili masugdan ang pagtukod sa usaka government building sama sa mga pampublikong tulonghaan kung kulang kini sa building permits.
Segun ni Ortiz, ang pag-comply sa mga rekwisitos sama sa pagkuha og building permits maoy ilang basehan sa pag-implimentar sa proyekto apan kun wala kini, dili usab matukod ang usaka gambalay.
Gani tanang mga istruktura sa nagkadaiyang buhatan sa gobyerno nagcomply sa gikinahanglang mga permits sama sa electrical, building ug uban pang kinahanglanon.
Matud ni Ortiz nga kun makumpleto na ang tibuok proyekto subay sa gitagal nga timeline, gilayong i-turnover ang gambalay ngadto sa partikular nga ahensiya sama sa DepEd diin ang DPWH wala na’y labot sa pagsusi sa mga rekwisitos kun padayon ba kining nasunod o wala.
Hinoon, kabahin sa trabaho ug obligasyon sa DPWH mao ang pagmentenar ug pag-ayo sa guba nga gambalay.
Apan magdepende gihapon sa request gikan sa mga kadagkuan ug dili usab tanang mga hangyo ma-akomodar sa DPWH gumikan sa kagamay sa pundo nga nabilin karon.
Nagdumili na sa pagtubag si Ortiz kalabot sa report nga 90% sa mga school building sa tibuok rehiyon walay mga building permits ug nakitaan pa gayud og bayolasyon sa fire safety standards.
RadyoMaN Joel Viray
