Matud ni DPWH XI Spokesperson Dean Ortiz nga anaa na sa 95% ang konstruksiyon ug 5% na lamang ang kuwang og makumpleto na ug mahuman ang Davao Coastal Road ug lagmit sulod sa Ikaduhang quarter karong tuiga maablihan na kini alang sa mga motorista ug sa general public.
Segun ni Ortiz, hapit na matapos ang tulay nga ginamugna sa may Sta. Ana Wharf nga magsumpay sa Barangay Leon Garcia ug sa Agdao area diin ang ginahimo na lang padayon ang tulay nga magkonekta sa Talomo ug Punta Dumalag ug kon makumpleto na kini sa buwan sa Mayo karong tuiga hayan matiwalan na sa mga Dabawenyo ang kaanindot sa maong proyekto.
Gibatbat sa tigpamaba nga dako kini og tabang sa pag-decongest sa trapiko diin gibana-banaan ang biyahe gikan sa usa ka oras sa naandan mahimo na lamang kini ngadto sa kuwarenta minutes.
Ang multi-billion pesos nga coastal road dunay mga amenities sama sa play ground, jogging area, business area, ug uban pa.
Nasayran nga dunay kapin 19 bilyones ka pesos nga kinatibuk-ang pondo ang maong proyekto nga gisugdan niadtong tuig 2017 ilawom sa ‘Build, Build, Build’ program sa administrasyon ni kanhi President Rodrigo Duterte.
RadyoMaN Joel Viray
