Davao City – Ginasusi na karon sa Department of Public Works and Highways kun DPWH XI ang naguba nga slope protection sa Lower Sambunotan, Marilog District ning syudad sa Davao.
Sa pakighinabi sa DXDC RMN Davao kang DPWH XI spokesperson Dean Ortiz, giingon niini nga padayon ang ilang imbestigasyon og may tulubagon ba ang contractor sa proyektong slope protection diin kini maoy usa sa mga pamaagi nga mapugngan ang pagdahili sa yuta ug maprotektahan ang dalan.
“Ug sa karon anaa pa siya sa warranty period sa structural defect, so depende sa mugawas sa gihimo nato nga pagsusi kung sala sa contractor o dunay problema sa structure nga iyang gibuhat, it can be his liability but if we find out that it’s an act of nature, we will propose a separate project for that,” sumala ni Ortiz.
Kahinumduman nga nahugmak ang maong butang sa nasangpit nga lugar gumikan sa kusog nga ulan niadtong adlawng Sabado diin saysay sa tigpamaba base usab sa reports nga wala miagi ang tubig-ulan sa drainage nga gibutang ug didto kini miagi sa slope protection.
Dugang niini nga base sa report sa field nga ang slope protection ra ang apektado sa panghitabo gani nangayo og despensa ang DPWH XI bahin sa insidente.
“Sa mga residente sa Sambunotan Marilog, mangayo lang ta og pasyensya sa hasul nga gihatag ana nga insidente nga nahitabo. Rest assured nga gibuhat nato sa DPWH ang tanan nato mabuhat to make your location kanang part sa National Highway to be safe and convenient para sa tanan. Sa karon nagbutang naman ta og mga personahe didto, dunay mga warning signs aron magiyahan ang mga motorista pag agi nila,” dugang ni Ortiz.
RadyoMaN Renz Barbarona
