Davao City – Luwas pa gamiton matud pa ang Talomo Bridge II nga nahimutang sa may Ulas, ning syudad sa Davao.
Kini maoy gibutyag ni Departmet of Public Works and Highways (DPWH-XI) spokesperson Dean Ortiz kinsa miingon nga precautionary measures lamang ang ilang ginabuhat aron malikay ang pagkahugmak sa kapin 20 anyos na nga tulay.
Sumala ni Ortiz, aduna lamang kapasidad nga 48 tons ang tulay gani gilimitahan na lamang nila karon sa 15 tons ang matag truck gumikan kay usa kini sa rason sa pagkabawg niini.
Sa ilang pakigkoordinasyon sa City Transport and Traffic Management Office (CTTMO) adunay ipahigayon sugod karong adlaw’ng Sabado, Hulyo 21, nga dry run kalabutan sa pag-agi sa Talomo Bridge 2.
Gitataw ni CTTMO chief Dionisio Abude, sugod alas 6:00 sa buntag magsugod ang dry run diin gipasabot nga magdugay kini hangtod sa mouyon na ang re-routing scheme sa mga byahe sa truck nga nagaagi sa maong tulay base sa ilang plano hangtod sa pagsugod sa rehabilitasyon niini.
Gani andam ug kumpleto na ang mga advisories ingon man ang mga directional signages nga gamiton subay sa maong dry run.
“Before 6 o’clock magdeploy na ta’g mga tao sa mga lugar before sa Crossing Bayabas Toril, before Puan, before Ulas, ug before sa bridge mismo para mag identify sa mga trucks nga sobra 15 ka tonelada,” segun ni Abude.
Base sa gipagula’ng rerouting scheme, ang mga gikan South nga truck nga ang ruta paingon sa Bukidnon mamahimo’ng muliko sa Crossing Bayabas Toril paingon sa Mulig gawas sa Quarry area samtang ang mga ruta nga mosubay sa Mc Arthur Highway mamahimong muagi sa Puan paingon sa Bypass road dayon Diversion Road.
Lantaw ni Abude nga sulod sa usa ka bulan masayod na ang mga driver bahin sa re-routing scheme diin dili na sila maglisod pag-abot sa panahon nga sugdan na ang rehabilitasyon sa maong tulay.
RadyoMaN Jason Amisola
