Kini ang reaksyon sa usa ka Davao drag performer ug event organizer nga si Harold Quibete sa nag-viral ug kontrobersyal nga performance sa drag artist nga si Pura Luka Vega pinaagi sa “Ama Namin” remix medley cover.
Sa interview sa DXDC RMN Davao kang Quibete, iyang gipasabot nga isip performer o entertainer, sa imong pagpadayag sa imong talento, angay usab nimo nga irespeto ang ubang tawo ilabi na kung kini may kalabutan na sa ilang pagtuo kun religious belief.
Dugang ni Quibete nga inay nga mangayo og pasaylo, gisegundahan hinuon niya ang paghimo og video pinaagi usa ka review vlog kalabot sa hustiyas, butang nga nakasamot sa kalagot sa netizens ug sa mga magtutuo.
“Within this freedom, naa man gud ‘tay ginatawag nga responsibility pud. It doesn’t mean that you are already entitled to making so many things that would step over the border of other people’s feelings and rights. In every action, there is always an opposite reaction,” matud ni Quibete.
Apan sa pangutana kung angay pa ba nga ideklara sa Davao City si Luka isip persona non grata, opinyon ni Quibete nga dili na kinahanglan tungod kay bisan pa og unsaon pagsilot ang tawo, ang pagbag-o anaa gihapon nakadepende sa iyang kaugalingon.
RadyoMaN Kirby Manzon
