Davao City- Human sa gipahigayong presscon ni Davao City Mayor Inday Sara Duterte-Carpio, sa susamang news forum, misunod ang isguon niini nga si Vice Mayor Paolo “Pulong” Duterte diin usa sa mga gibigwasan niini mao si Sen. Antonio Trillanes IV kabahin sa isyung P6.4B shabu shipment gikan sa China, akusasyon nga siya miyembro sa gikaintapang Chinese criminal syndicate nga triad base sa usaka ‘dragon tattoo’ sa iyang likod nga bahin, mga pagkwestion sa iyang kapasidad-pinansiyal ug uban pang alegasyon.
Gisulti usab sa bise alkalde nga dili pa karon ang panahon aron ipakita ang iyang tattoo sa likod.
“Tama tong abogado nako, dili mi uto-uto, pero when the time comes, ipakita nako ni. Giingnan nako ang akong tattoo artist not to post my tattoo so siyempre palaguton gyud ang kalaban hangtod mabuak ang ilang utok labi na ning yellowtards, labi na ng naa sa social media nga murag buang makastorya, let them eat the dragon then I’ll show you my tattoo, not now,” sulti ni Pulong.
Nagpahungaw pag-usab sa iyang kasagmuyo ang bise-alkalde gumikan sa mga pagpangdaut sa senador ngadto sa pamilyang Duterte ilabi na nga naapektuhan na niini ang iyang mga anak.
Sa pikas bahin, sa pamahayag ni Pulong, nangayo kini og pasensya sa iyang amahan nga si Presidente Rodrigo Duterte diin iyang gibutyag nga aduna siyay nasagap nga intelligence report nga niadtong niaging tuig, adunay sekretong panagtagbo nahitabo sa US Embassy gitambongan sa usaka kanhi-presidente ug tulo ka mga negosyante alang sa destabilisasyon sa rehimeng Duterte.
Kasamang Renz Barbarona
