Cauayan City, Isabela – Patay ang isang drayber ng motorsiklo matapos itong bumangga sa kasalubong na elf sa pakurbang daan sa Barangay San Pablo, Cauayan City.
Kinilala ang nasawi na drayber ng motorsiklo na si Manny Calipjo, 29 taong gulang, walang asawa at residente ng Baculod, Cauayan City.
Habang kinilala naman ang drayber ng elf na si Odilon Tunac, 64 taong gulang, may asawa, isang mag-sasaka at residente ng Barangay Gappal, Cauayan City.
Batay sa imbestigasyon ng kapulisan ay bumabaybay si Calipjo patungong kanlurang direksyon sa nasabing daan at nasa kasalungat na bahagi ng daan naman si Tunac papuntang Baculod Cauayan City.
Nang marating ang pinangyarihan ng aksidente ay natumbok ni Calipjo ang elf na minamaneho ni Tunac.
Dahil sa lakas ng banggaan ay nagtamo ng matinding sugat sa katawan si Calipjo na naging sanhi ng kanyang agarang kamatayan.
Samantala hindi na ngsampa ng kaso ang pamilya ni Calipjo at napagkasunduan ng magkabilang panig na pagtutulungan na lamang ang gagastusin sa libing ni Calipjo.
