Patay ang usa ka drayber sa ambulansya human gipusil sa gwardya sa gitrabahoang ospital mga alas 6 kagabii .
Ang biktima mao si Sydney Guttierez Sabijon, 44 anyos, nga taga Poblacion, Tagoloan, Misamis Oriental usa ka drayber sa ambulansya.
Nasayran nga naabtan na lang sa witness nga si Jeffrey Plaza, usa ka wardman, ang mga kauban niini sa trabaho nga naglalis hangtud nga gipusil sa gwardiya ang biktima.
Ang suspek nailang si Ronnel Gurtigo Luyugoy, Â 27 anyos nga taga Malitbog, Bukidnon, usa ka gwardiya sa St. Paul Hospital sa Tagoloan, Misamis Oriental.
Matud ni PO3 Charley Cabaltiera sa Tagoloan Municipal Police Station nga gipusil ni Luyugoy ang driver sa ambulansya gamit ang iyang isyung armas nga usa ka Caliber 38.
Nakaangkon ang biktima sa usa ka igo sa kilid nga maoy hinungdan sa iyang pagkamatay.
Nagduda ng kapulisan nga away sa trabaho ang hinungdan sa panaglalis sa biktima ug suspek.
Sa karon, gipangita pa sa kapulisan ang gwardiya nga si Luyugoy.
