Drayber sa wing van giklarong wala kini nisibat sa disgrasya ug nangayo’g pasaylo

Davao City – Giklaro sa drayber sa wing van truck nga nakaligis patay sa duha ka mga nagmotor nga wala kini nisibat human sa disgrasya kagabie sa Km 17 Ilang, Davao City.

Gibutyag ni Marlo Pelobello, nga taga-Prk. 2 San Roque, New Bataan, Davao De Oro sa interbyu sa DXDC RMN Davao nideretso kini ug ni-surrender sa kapulisan sa Sasa.

Paadto ang drayber sa Panacan aron ihatod ang kopras nga kargada sa iyahang gimanehuang truck dihang nahitabo ang aksidente.

Nangayo kini’g pasaylo sa mga kabanay sa duha ka namatay sa insidente kay wala niya tuyua ang nahitabong pagligis sa mga biktima.

Segun ni Police Major Jake Goles, Station Commander sa Bunawan Police Station, ang tulo ka mga sakyanang nalambigit sa disgrasya parehong parehong pabyahe sa downtown sa Daang Maharlika National Highway gikan sa North Direction.

Nibangga ang Suzuki Raider150 Fi nga motor sa mga biktima nga gidrayban ni Algen Lanaja ug backrider nga si Hope Angelou Rangad sa nag-una nga motor ug tungod sa kakusog sa impact nalabay sa ang mga biktima ngadto sa lane sa wingvan truck ug nalatayan sa ligid ang mga biktima hinungdan sa ilahang kamatayon.

Samtang ang nakahiagom og minor injuries ang drayber sa usa pa ka motor ug backrider niini.

Kasong Reckless Imprudence Resulting in Multiple Homicide and Damage to Property ang ipasaka batok sa truck driver sa Lunes.

RadyoMaN Aimee Guinita