EB MAGALONA, NEGROS OCC. – Gin-declare dead on arrival sa ospital ang drayber sang motor matapos ini aksidente nga nakabunggo sa isa ka taxi sa national highway sang Had. Lumbia, Brgy. Alicante, EB Magalona.
Nakilala ang biktima nga si Victor Laurilla, 33 anyos, kasado kag pumuluyo sang Villa Miranda, Brgy. V1-A, Victorias City, drayber sang motorsiklo, samtang ang drayber naman sang Crosswind taxi ginkilala nga si Joebert Mendoza, 39 anyos, pumuluyo sang Talisay City.
Suno sa hepe sang EB Magalona Municipal Police Station nga si P/Sinsp. Jaynick Bermudez, ang motorsiklo ang nagadalagan pa norte bangud manugpauli na kuntani sa Victorias ang biktima.
Base sa imbestigasyon, gin-agaw sang motor ang lane sang pasugata nga taxi nga padulong naman sa sur nga direksyon rason nga ini ang nakabunggo.
Ginhingagaw pa dala sa Teresita Jalandoni Provincial Hospital sa Silay City ang biktima apang ini ang gin-declare nga dead on arrival sang attending physician, samtang ang driver naman gilayon nga nagsungka sa utoridad kag sang ulihi gin-release man bangud nag-aregluhanay ang tag-iya sang taxi kag ang pamilya sang biktima.
[image: image.png]
