Davao City – Pabor ko sa suhestyon nga himoong binulan kun monthly ang salary nga pagadawaton sa tanang mga Public Utility Vehicles drivers ilabi na ang mga taxi ug PUJ drivers gumikan sa kalisud karon sa atong panahon nga halos ang tanan nagsaka na ang presyo ilabi na sa mga batakang palaliton.
Pabor sa side sa mga drivers ang maong sugyot-balaudnon sanglit masegurado na man unya ang ilang pamugas matag petsa 15 ug 30 or bin ba kaha kada petsa 10 ug 20 kun regular fixed monthly salary na sila inay nga arkila kun boundary system.
Kun fixed na ang ilang kitaon, dili na sila mowadwad pa’g maayo daw mura’g wa nay ugma ug dili na unya sila magpahaguros ug dagan pareho karon nga morag tren mopalupad sa yunit kay lagi sila nag-apas sa oras haron mas daku-daku ang kinitaan ug adunay bastanteng sapi nga madala sa pamilya alang sa inadlaw-adlaw’ng mga panghinahanglanon pang-ekonomiya.
Usab basin ug pinaagi niana, mamenos-menosan usab nato puhon ang mga insidenteng road crashes kay relax na man unya ang driver sa iyang pamati.
Ang pangutana: Mosugot ba kaha niini ang mga PUV unit operators and franchise holders? Dili kaha usab kini mosangpot sa pagtinapulan sa driver kay anyway, aduna na man siyay ciertong dawaton?
Alang nako, maayo kini nga ideya or sistema sa pangita sa atong mga trabahante sa public transport sector apan angay adunay igong mga safeguards nga dili usab kini abusohon sa mga intended beneficiaries niini ug aron usab dili mabutang sa alanganin ug perdisyon ang operator kinsa maoy kapitalista sa maong negosyo.
Sa mga operator, dili ‘ta maghinakog: Kun mo-ginansya mo pinaagi sa singot ug dugo sa mga gagmay’ng naggunit sa manibela, atong ihatag usab ang unsay angayang madawat nga patas nga suholan sa mga nagpadagan sa inyong negosyo kay kun walay driver, wala pud mo sa inyong negosyo, sa tinood lang!
Ang tawag niana, ‘buhi-buhi’ aron ang duruha ka bando mabuhi nga mahugaway: Mokita ang driver ug ang operator usab mo-ginansiya haron ang negosyo ug panginabuhi sa duruha magapadayon, magmalampuson ug magmabungahon.
RadyoMaN June Duterte
