TACLOBAN CITY – Nabunggo ngan nadanas han dumptruck an Campetic nga Multicab kun diin mayada ini sakay nga lima nga pasahero ha Marasbaras Road Brgy. 82 ha Marasbaras ha Tacloban, alas 10:30 han aga kakulop.
Ginkilala an mga biktima nga sakay han multicab nga hira Charito Matinito Donayre, 42 anyos, may asawa, hiya an driver han multicab ngan residente ha Brgy. 78 Marasbaras ha Tacloban; Apple Capilihan Meniano, 33 anyos, mayada live-in partner, college graduate, may trabaho ngan residente ha Pawing, Palo, Leyte; Jade Lita Remandaban, 29 anyos, mayada live-in partner may trabaho ngan residente ha Pawing, Palo Leyte; Diosdado Permalos Cabalos, 49 anyos, may asawa, usa nga Sales Man ngan residente ha Brgy. 110 Utap ha Tacloban ngan hi Mark Brando Morales, 28 anyos, college graduate, usa nga teacher ngan residente ha Brgy. 2 Poblacion, Pambujan Northern Samar.
Ginkilala naman an driver han dumptruck nga hi Danilo Tambis Calio, 58 anyos, may asawa ngan residente ha 112 Real St. Sagkahan ha Tacloban.
Ha nagawas nga inisyal nga imbistigasyon han Tacloban PNP, an Campetic nga multicab in tikang ha Palo, Leyte ngan ginbabaybay an kakalsadahan han Marasbaras National Road pero an dumptruck in nag-encroach ha lane kun diin nadalagan an Campetic nga multicab ngan didto na nagbungguay an duduha nga behikulo.
Han kakusog han impact han padalagan han dumptruck, nahihapil an Campetic nga multicab.
Gindara ha hospital an mga samaran nga biktima pero namatay hi Diosdado Permales samtang ginbubulong ha hospital.
Ha interview han RMN kan PCInsp. Rex Cantillep, Deputy City Director han Tacloban PNP, ini hi Diosdado Permales in kasasakay han multicab han mahinabo an aksidente.
“Nagkaada hin bari ha iya ribs amu ini an nakita nga ftal injury ha iya ngan ini nga biktima in bag-o pala pagud nga nasakay, han pagdalagan han sarakyan didto na mahinabo an aksidente.”
Ha pagka-yana paslak na an driver han dumptruck ngan papasakahan hin kaso nga reckless imprudence resulting to homicide and multiple serious physical injuries.
Babatunon naman han Esperas Construction And Development Corporation amu ini an tag-iya han truck an mga garastuson medical han iba pa nga biktima.
