Wala nang buhay at duguan ang hindi pa kilalang driver nang matagpuan sa loob ng kaniyang minamanehong taxi sa Quezon City.
Sa report ng Anonas Police Station (PS-9) ng Quezon City Police District (QCPD), bandang 2:15 kanina ng hapon nang madiskubre ang driver na nakasuot ng pulang t-shirt sa loob ng taxi na may body markings Nelson and Christy, may plakang ABP 9788, na nakaparada sa harapan ng No. 122 B Anonas Extension, Quezon City.
Batay sa inisyal na imbestigasyon ni PSSg. Francis Xavier R. ng PS-9, naispatan umano ni PCpl. Jesus Tigalo ng QCPD ang taxi na may bahid ng dugo sa labas maging sa kalsada na pinaradahan nito.
Dahil dito, sinipat ng pulis ang loob ng taxi at doon ay nakita niya ang duguang lalaki na nakahandusay sa driver’s seat.
Agad na inimpormahan ni Tigalo ang District Tactical Operations Center (DTOC) na siya namang nag-report ng insidente sa Anonas Police.
Inaalam pa ng mga awtoridad kung hinoldap ang driver at naghahanap na rin sila ng CCTV sa lugar upang makilala ang salarin.
