Davao City – Patay ang usa ka driver human kini gitabangan og kulata alas 12:30 sa kagabion nahitabo sa Pitchon St. Barangay 5-A Bankerohan siyudad sa Davao.
Subay sa report gikan sa blotter sa kapolisan sa San Pedro PNP giila ang biktima nga mao si Jacaria Dimaapao, 47 anyos nga taga Duwha San Rafael, Barangay 9-A ning dakbayan sa Davao samtang wala pa mailhan ang mga suspetsado nga maoy responsable sa pagpangulata.
Matud pa samtang kining biktima gikan nakig inom ug pauli na unta sa iyang panimalay apan pag-abot diha dapit sa usa ka food chain sa nasangpit nga lugar kalit kining giduol sa wala mailhing mga suspek dayon gitabangan ug kulata resulta sa pagkamatay niini gumikan sa bun-og nga naangkon sa biktima sa nagkadaiyang parte sa iyang kalawasan.
Human sa hitabo ang mga suspitsado kalit niiktad sa wa matinong lugar.
Gilayon gikuha sa pamilya ang patayng lawas sa biktima aron mapahiluna ug ilubong dayong subay tradisyon sa atong mga kaisgsuonang Muslim.
Samtang ang kapolisan sa San Pedro PNP naglusad pa ug dugang imbestigasyon kung unsa ang motibo sa pagpangulata sa biktima nga niresulta sa iyang kamatayon.
RadyoMaN Don Pulayao
