Dumalinao, Zamboanga del Sur – Nailhan na ang driver nga nakalas sa ulahing hitabo nga aksidente sa national Highway sa lungsod sa Dumalinao pasado alas 9:00 kaganihang buntag nga gikalambigitan sa duha ka dagkong sakyanan nga fishcar ug forward.
Kaganiha atong nasayran nga ulahing nakuha sa dapit nahitaboan ang driver sa forward nga dili na mahitsura human kining nakuho-ot sa sakyanan.
Gipaningkamutan sa RMN DXPR Pagadian Newstaem nga maila ang maong driver diin alas 4 karong hapon nailhan na ang driver nga nakalas nga si Mario Balabag, residente sa purok 3 Lemonan, San Miguel Zamboanga del Sur.
Samtang sa pikas bahin blangko gihapon ang otoridad sa pag-ila sa driver sa fishcar nga unang gikataho nga maoy nawad-an sa control nga niresulta sa pagsungag sa kasugat nga forward ug lain pang single motor.
Sumala sa nakasaksi nga si Marivic Paglinawan kalit kaayo ang hitabo kay dihang nagkapuliki siya sa paghan-ay sa mga baligya nga pag-kaon kalit niyang nabati ang kusog nga paglagubo ug iyang nasiplatan ang nagdagan nga fishcar color blue nga nagtangag sa plaka numero XFA-897 paingon sa ilang gipuwestohan.
Kasamtangan nga naglusad sa makuting imbestigasyon sa kapulisan labot sa hitabo.
