Driver sa Bus tagbuno-patay suyod sa Bus samtang no-parking na sa Surigao Integrated Bus and Jeepney Terminal sa Brgy. Luna, Surigao City

Driver sa Bus tagbuno-patay suyod sa Bus samtang no-parking na sa Surigao Integrated Bus and Jeepney Terminal sa Brgy. Luna, Surigao City, suspek nangisog gumikan sa kusog na serbato. Tagkilaya an biktima na si Louie Talbo Viola, 40 anyos, minyo, driver sa Bachelor Bus, residente sa Maharlika, Hinatuan, Surigao Del Sur. Sa inisyal na imbestigasyon nan PNP ug sumbong sa conductor na si Dennis Cangas Acdal, sija ug an driver na si Viola an nagbiyahe gikan sa Butuan City ug pasingod sa Surigao City, pag-abot sa may Mabuhay, Sison, isa ka kolor itom na motorsiklo sakay an isa ka waya kilay-i na layaki an nolabay ug nag-una sa ila sa may center lane. Sa amo na sitwasyon, tag-serbatuhan ini nan driver na si Viola ug mi-overtake sila. Sa dihang didto na sila nagsubay sa may Brgy. Quezon, an driver sa motorsiklo an misinggit dapit sa driver nan mga pulong na “Bantay rakaw sa ako pag-abot!”. Didto tag-serbatuhan nasab ini ni Viola ug tagbalewaya an hulga. Pag-abot nan bus sa Surigao Terminal, nokanaug na an tanan pasahero. Kalit na misaka an suspek suyod sa bus ug una na naglalis an duha. Sunod niini an pagbuno sa makadaghan na higayon nan suspek kan Viola sa lain-laing bahin sa lawas na nahimong rason sa hinanali na kamatayon niini. Gamit sa pagbuno an isa ka sundangay na na-recover sa bus. Sa pagkakuman padajon na taghanap nan mga otoridad an suspetsado sa tabang sa CCTV camera sa palibot sa tagkahitabuan.

Facebook Comments