Patay ang 35 anyos nga motorista human madisgrasya sa Purok 7, Danao, Jasaan, Misamis Oriental.
Matud ni Police Captain Danilo Calurasan, ang Chief of Police sa Jasaan, Municipal Police Station, naila ang biktima nga si Wilson Balasabas Macaranas Jr, taga Langcangan, Mahinog, Camiguin province.
Sa imbestigasyon sa kapolisan, padulong sa Gingoog City ang biktima apan pag- abot sa area, mi-overtake kini sa usa ka wing van nga kargado sa ilimnong makahubog kinsa gimaneho sa usa ka Ritchel Magpale Castulo, 42 anyos, taga Lugod street, Barangay 14- Gingoog City.
Nasayran nga na out of control ang drayber sa motorsiklo ug didto kini milagpot sa agianan sa wing van, hinungdan nga kini nalatayan.
Naangkon sa biktima ang grabe nga kaguba sa ulo nga bahin, nga maoy hinungdan sa iyang kamatayon.
Nasayran usab nga gisulayan pa og dala sa hospital ang biktima, apan dead on arrival na kining gideklara sa doctor.
Samtang bolontaryo nga misurender sa Balingasag Municipal Police station ang drayber sa wing van human sa aksidente.
Matud ni Police Captain Danilo Calurasan ang Chief of Police sa Jasaan, Municipal Police Station, nga sa Balingasag police misurender ang drayber sa van nga si Ritchel Magpale Castulo, tungod kay mas duol sa area ang insidente.
Dugang pa ni Captain Calurasan, nga sa karon detinado na sa ilang detention cell si Castulo, human nila kini gikuha sa Balingasag ug gibalhin sa ilang pasilidad.
Sa karon kasong Reckless Imprudence Resulting to Homicide ang atubangong kaso ni Castulo.
