Driver sa truck ug pamilya sa motor rider nga namatay sa Carmen, nag-areglo

Davao City – Gibutyag sa Carmen Municipal Police Station (MPS) nga nag-areglo na o nagkasabot na sa korte ang duha ka kampo nga nalambigit sa aksidente sa Highway 26, Barangay Asuncion, Carmen, Davao del Norte, alas 11:20 sa gabii niadtong Marso 2, 2023.

Sa interbyu sa DXDC RMN Davao kang Police Major Ian James Acal, Acting Chief of Police (ACOP) sa Carmen Municipal Police Station, giila niini ang biktimang namatay o ang driver sa motor nga si alyas Rey, taga Barangay Sto. Niño, Carmen, Davao del Norte.

Samtang, ang driver sa six-wheeler prime mover truck mao si alyas Larry nga taga Barangay Kingking, Pantukan, Davao de Oro.

Sa inisyal nga imbestigasyon, alas 10 sa gabii samtang padulong sa Poblacion, Carmen ang truck, nag-U-turn kini pabalik sa Panabo, ug didto nabangga ang motor nga kusog ang dagan hinungdan nga dead on arrival ang driver niini.

Pahimangno sa pulis sa mga motorista nga mag-amping kanunay sa pagmaneho, diin nasayrang walay helmet o safety gears ang biktima.

“Kita maghinayhinay sa atoang pagmaneho ug siguradohon nato nga magsuot ‘ta sa atong safety gears ilabi na kadtong mga nag-drive sa mga motorsiklo. Atong likayan nga magmaneho nga kita nakainom,” pahimangno sa pulis.

RadyoMaN Kirby Manzon