Davao City – Dakung uyon ug walay nakitang sami ang sektor sa panakayan ingon man mga sumasakay sa dakbayan sa Day 1 implementation sa Republic Act 10913 kun ang Anti-Distracted Driving Act.
Sa random interview sa programang RMN Straight to the Point, gisugilon sa driver nga si Hector Fuerte, 52 anyos kansang ruta mao ang Tagakpan-Roxas–Mintal nga mas maayo gani nga adunay klarong balaud magdili sa iresponsableng paggamit sa mga cellular phones ug uban pang mga gadgets mientras nagmaneho.
Sa iyang kabahin, gipaambit sa lain pang driver nga si Joseph Sarabia, 50 anyos kansang ruta mao ang Acacia Buhangin ug vice-versa nga mas maayo kini haron mahalikay ang katawhan gikan sa disgrasya ingon man klarong kamatayon gumikan sa mga fatal road crash incidents.
Ubos sa revised and modified Implementing Rules and Regulations sa RA 10913, tugtan ang pagbutang sa usa ka ‘safe zone’ sa dashboard sa sakyanan diin mamahimong ibutang ang mga cellphones ug uban pang mga gadgets.
Hugot nga gidili ang ‘texting and calling’ samtang naggunit sa manibela o bin ba kaha kun anaa nagpondo sa traffic lights gawas lamang kun gikinahanglan nga mohimo sa ingon gumikan sa emerhensiya ug angayang mangayo og assistance ngadto sa mga awtoridad.
Mga malapasong drivers mag-atubang ug multa kantidad P20,000 ug ang posibleng pag-revoke sa driver’s license. Sa kaso sa mga public utility vehicle drivers, dili mo-ubos sa P30,000 nga multa ipatuman kun ang salaud nahimo sulod sa 50-meter radius gikan sa nahimutangan sa mga eskwelahan.
Mientras gisugilon sa sumasakay nga si Junamie Flores, 25 anyos nga residente sa Tagakpan nga gikalipay sa mga commuters ang nasangpit nga regulasyon sanglit dili na maihap ang mga panghitabo diin daghan ang nakabsan sa kinabuhi ingon man naangol diha sa kadalanan gumikan sa driver’s error or error in judgment gumikan sa mga distractions.
Kahinumdoman nga ning labing ulahi, usa ka UV Express Van nga puno sa mga pasahero nisungag head-on sa usa ka ten-wheeler truck sa Bunawan District diin niresulta sa mga angol ug patay.
Usab ning bag-o lang, usa ka private dump truck nahagbong sa bung-aw nga porsyon sa Carmen Tugbok District resulta sa pagka-angol sa tulo ka mga tawo. Ning semanahona, lain pang motorista patay usab sa dihang nikaliring sa silong nga bahin sa mga behikulo diin siya naligsan.
Kasamang Don Pulayao
