Davao City – Nagtoo ang Davao City Drug Abuse Council (CADAC) nga dunay mga barangay kapitan ang nalambigit sa gidiling droga nga naa karon sa listahan ni Pres. Rodrigo Duterte.
Sumala ni CADAC researcher Connie Domag, sa ilang buhatan dili sila makakompirmar kabahin niini tungod kay wala silay gikuptan nga listahan sa pangalan apan kung ibase sa mga drug surrenderee gikan sa barangay nagpasabot nga dunay barangay kapitan nga nalambigit sa operasyon sa droga.
Angayan lang ipahibalo sa publiko ang pangalan nga anaa sa narco list una matigayon ang filing sa certificate of candidacy aron mamahimong giya sa mga botante kung kinsa ang ilang pilion.
Walay nakitang kalapasan sa privacy sa mga nahisgutan ang pagbulgar niini tungod kay mga alegasyon lamang kini nga mamahimong dili tinuod.
Giklaro usab ni Domag nga walay garantiya nga dili masambugan sa politika ang narco list tungod kay dili kini mapugngan apan mag-agad na lang sa katawhan kung motoo sila niini o dili.
RadyoMaN Bernard Pantallon
