Drug den sa Davao del Norte napuhag sa PDEA, tulo nadakpan

Davao City – Napuhag sa mga ahente sa Davao Del Norte Provincial Philippine Drug Enforcement Unit ang Drug Den sa Purok 3A, Barangay Sto.Niño, Carmen sa maong probinsiya bandang pasado 1:00 sa kadlawon gahapon adlawa.

Target sa operasyon ang usa ka drug den maintainer nga giilang si Rolly Boy Sepe, 25 anyos, ulitawo, machine operator, ug residente sa nasampit nga barangay kinsa napalitan og usa ka pakete sa gitohoang shabu nga mutimbang og usa ka gramos nga dunay market value nga 10,000 pesos.

Atol sa ronda, naaktuhan sab sa mga agents sa Davao Del Norte Provincial- PDEA ang duha ka bisita nga giilang sila Jan Kevin Moreto ug Listher Ortega nga nag-pot session hinungdan nga apil sila gipangdakop sa mga otoridad.

Nakuha gikan sa mga dinakpan ang laing walo ka pakete sa gitohoang shabu ug gibana-banaang mutimbang tanan og sais grams nga dunay market value nga kapin 40,000 pesos.

Ang tulo pareho mag-atubang og kasong may kalapasan sa Republic Act 9165 kon Comprehensive Dangerous Drugs Act of 2002.

RadyoMaN Joel Viray