Davao City- Dili angay kabalak-an ang pagbutang og mga drug drop box sa mga nagkadaiyang Barangay sa nasud.
Kini ang gisulti ni Rodolfo Te, Brgy. Captain sa Brgy. Daliao Toril ning syudad sa Dabaw atol sa interview sa DXDC RMN Davao kaniya diin subay kini sa gikabalak-an sa ubay-ubay ka mga residente ilabi na sa Luzon area ang pagbutang og giingong drug drop box sa mga Brgy. basin og mahimo lang kini og yaga-yaga ug bisan unsang pangalan nalang ang ibutang.
Sumala ni Te, maayo man usab nga dunay drop box aron dunay dugang impormasyon ug mga pangalan sa mga imbestigahan ug i-monitor kung kinsa kadtong mga nalambigit sa iligal nga binuhatan apan sigurohon lang sa mga otoridad ug mga Brgy. Officials nga tarungon og maayo ang pag-validate ug dili magpataka og tuo dayon sa mga pangalan nga makita sa drop box.
Una ng giingon ni Department of Interior and Local Government (DILG) Acting Secretary Catalino Cuy na salaon nila pag ayo ang mga pangalan nga ibutang sa nasangpit nga drop box gani gidepensahan usab kini sa Philippine National Police (PNP) ang maong mando diin ilang imbestigahan og tarong ug dili nila arestuhon ang suspek og walay igong ebidensya.
Kahinumduman nga gisugdan na sa DILG ang pagbutang og mga drug drop box sa pipila ka mga lugar sa nasud.
RadyoMan Renz Barbarona
