Davao City – Aron maseguro nga mahubas ang tinubdan sa iligal nga droga sa tibuok Pilipinas, angay unahon sa kapulisan ug sa Philippine Drug Enforcement Agency (PDEA) ang paglutos sa mga druglord imbes magtutok sa mga pushers ug sa mga users.
Hangtud dili matabas ang pinaka-ugat sa sindikato sa droga dili usab ma-undang ang pagsalingsing sa mga sanga sa punuan ug padayon kini maghatag og kadaot sa kaugmaon sa atong katilingban.
Positibo si United Leaders Advocators of Davao Del Norte Kabataan president Dr. Faith Prieto nga kaya kab-uton sa gobyerno ang paghimo sa pilipinas nga drug-free kana kun unahon ang mga druglords ug dili ang mga users.
Walay duda nga numero uno naghatud sa dakong problema sa atong nasud ang iligal nga droga tungod pwede gub-on ang pangisip ug ang kaugmaon sa mga kabataan lakip na ang mga hamtong.
Gipamahayag ni Dr.Prieto, ang pagsumpo sa suliran sa droga dili lang kini trabaho ug obligasyon sa mga otoridad apan dunay dakong responsibilidad ang katawhan sa pagtapos sa makamatay nga bisyo.
Matud niini, kung makighiusa ug mutabang ang publiko sa gobyerno sa pakigbatok sa droga halapad ang kaugmaon nga mahimong drug-free ang Pilipinas inig human sa termino ni Pangulong Rodrigo Duterte.
Nasayod kita kung unsa kalapad ug kalawom ang sindikato sa droga tungod kay nagkanit-kanit ang ilang mga kapit ug koneksyon sa pipila ka mga opisyal sa gobyerno isip mga protektor sa ilang operasyon.
Anaa ang kaisog ni Pangulong Duterte sa pagbangga sa pader sa mga sindikato sa droga apan makawang lang kini kun dili andam makiglambigit ug mutabang ang mga lokal nga kagamhanan.
Dako usab ikatabang ang mga barangay council sa pagtuldok sa problema ug dili layo ang posibilidad nga katunga sa 42-mil ka barangay sa tibuok Pilipinas malimpyohan gikan sa droga pag-abot sa 2022.
RadyoMaN Joel Viray
