Davao City – Daku’g ikatabang ang mandatory ug random drug test nga giduso karon sa Kongreso aron hingpit kita nga masalbar gikan sa makalilisang nga impluwensiya sa droga pananglit diha sa mga trabahoanan.
Matud ni Davao City Anti Drug Abuse Council Head Ronaldo Rivera, dakung ayuda ang mandatory ug random drug test aron hingpit nga mamahimong gawasnon ang mga trabahante gikan sa dautang epekto sa droga.
Dugang ni Rivera nga dili makalapas sa katungod sa tawo ang mandatory ug random drug test sanglit ang tumong lamang niini mao nga maseguro nga walay adik nga nanarbaho sa mga kumpanya ug mga korporasyon.
Pabor si Rivera nga pangayoan og drug test results ang mangaplay og trabaho kay mao kana ang mando sa Republic Act 9165 nga angay sundon sa tanang kumpanya ug korporasyon.
Dugang pa sa opisyal nga dinhi sa dakbayan, istriktong gipatuman sa kagamhanang lokal ang ordinansa nga nag-obliga sa mandatory ug drug test sa tanang mga kumpanya.
Batbat ni Rivera nga makadaut sa panglawas ang droga busa makatarunganon lamang nga walay mga trabahanteng adik sulod sa mga workplaces.
RadyoMaN Joel Viray
