Davao City – Patay ang usa ka street level target human kini gituohang misukol atol sa gilusad nga drug buy-bust operation sa kapulisan nahitabo sa Brgy. Lapu-lapu, Agdao, ning syudad sa Davao niadtong adlawng Sabado, Nobyembre 17, 2018.
Sa report sa Sta. Ana PNP, suspek naila nga si Jerandie Ariego, alyas Tidoy, 31-anyos, kinsa responsable sa pagpayuhot og iligal nga droga sa Agdao area.
Atol sa operasyon, gipabuthan una sa suspek ang mga pulis hinungdan nga midepensa ang tropa hinungdan nga naigo ug napusilan kini.
Gidala pa sa balay-tambalanan ang suspek apan deklarado na kining dead on arrival.
Sa imbestigasyon sa Scene of the Crime Operatives kun SOCO, narekober sa maong panghitabo ang usa ka unit sa homemade caliber 22 revolver, mga bala, gituohang shabu, kwarta ug cellphone.
Sumala ni Police Regional Office kun PRO XI Regional Director Marcelo Morales, naaresto na kaniadtong 2010 ang maong suspek gumikan sa kasong kawat apan nakagawas niatong 2017 ug nahibal-ang mibalik na usab sa iligal nga mga hinimuan.
RadyoMaN Renz Barbarona/ RadyoMaN Don Pulayao
