Davao City – Nihinay ang supply sa iligal nga droga ingon man sa paghinay sa illegal drug trade dinhi sa dakbayan sa Davao.
Kini maoy gibutyag ni PDEA XI legal officer Atty. Joseph Tesiorna atol sa gipahigayong AFP-PNP Presscon base sa ilang narekober nga mga iligal nga droga.
“Wala na kaayo bulto [sa iligal nga droga] ang makuha sa Davao diin sagad madakpan mga byahero gikan Marawi, Cotabato, Zamboanga ug pipila sa Manila,” segun niini.
Sumala ni Tesiorna, mokabat sa 250 gramos ang nakumpiska nga iligal nga droga nga nagkantidad sa kapin P2.8M sa tibuok Rehiyon 11 sulod lamang sa bulan sa Hunyo.
Gisugilon ni sa legal officer sa PDEA XI nga gawas sa 182 ka mga barangay sa syudad, adunay 122 ang apektado sa iligal nga droga.
Apan gawas niini, positibong gibutyag ni Tesiorna nga 30% na lamang ang nahibiling pakgangong illegal drug trade and usage sa tibuok Rehiyon 11.
Base sa record PDEA, moabot na sa 38 ka mga barangay ang gideklarang drug clreared sa Davao del Norte, 25 ang sa Davao del Sur, 57 sa Davao Oriental, 22 sa Davao Occidental ug walay natala nga barangay sa Davao City alang sa bulan sa Hunyo.
Gipasabot ni Tesiorna nga mando ni Davao City Mayor Sara Duterte-Carpio nga gikinahanglan usa adunay contingency measures sa maong barangay una kini ideklara nga ‘drug-cleared’.
RadyoMaN Jason Amisola
RadyoMaN Jason Amisola
