Davao City – Alang nako, walay dautan sa gilaraw karon sa nasudnong kapulisan nga drug tests ngadto sa atong mga estudyante sa nasud sa kondisyon nga koridas ‘tang tanan, tinun-an o ma-teacher man – ang tanan angay mopailawom sa maong matang sa checkup aron mawala ang duda nga si tal pulano o tal pulana may kalambigitan sa droga.
Dili random, kon dili general, mandatory, compulsory or obligatory drug test susama sa rekwisito sa pagtenir ug medical certificate – kana maoy tan-aw nako mas angay nga sistema haron dili makabaton ug stigma kun negatibong impresyon ang publiko ngadto sa mga batan-ong matudlo nga ipailawom sa drug tests.
Gawas pa niana, mas maayong dili lamang usaka sektor ang ipaubos sa drug examination: Apilon tingali nato kadtong mga dagkung tawo, mga opisyales, mga anaa sa poder, mga ma-impluwensiyang personalidad haron dili mamahimong discriminatory ang maong medical test.
Kun gukdon nato ang mga estudyante, angayan lamang siguro nga atong gukdon ang mga dagkung tigpayuhot, mga druglords, drug protectors, financiers ug uban pa sanglit kini man nga hut-ong maoy matawag nga pandamay sa tanan kay kun wala pa unta ni sila, wala untay batan-ong malulong sa makabuang nga droga.
RadyoMaN June Duterte
