Abot sa 55 tsuper ng pampublikong transportasyon ang nagpositibo sa paggamit ng illegal drugs sa kabuuang 4,470 drivers na sumailalim sa drug test ng Philippine Drug Enforcement Agency sa ilalim ng Oplan Harabas program.
Ayon kay PDEA Director General Aaron Aquino ang drug tests ay isinagawa sa 54 na major public transportation terminals sa buong bansa.
Ang limamput apat na tsuper na binubuo ng 24 jeepney drivers, 13 tricycle drivers, 11 taxi cab drivers, 5 UV express van drivers, at 1 bus driver ay naging positibo sa paggamit ng shabu, habang ang isa ay tricycle driver na nagpositibo naman sa paggamit ng marijuana.
Ang Oplan Harabas ay isang simultaneous surprise mandatory drug testing sa lahat ng tsuper sa mga public terminals nationwide na layong tiyakin ang kaligtasan ng mga pasahero sa pagbiyahe at isulong ang isang drug-free public transport system sa buong bansa.
Base sa datus ng PDEA, mula January 2018 hanggang January 2019, 3,654 na tsuper , mga konduktor ng bus at dispatchers ang naaresto dahil sa paggamit ng illegal drugs.
Sa ikalawang semester ng 2018, abot sa 1,902 ang naaresto at may pagtaas ng 37% mula sa 1,386 na naaresto sa unang semester.
