General Santos City–Gikompirma ni Dennis Dominggo, tigpamaba sa DSWD Region 12 nga nagpadayon karon ang nasampit nga buhatan sa pag-implementar sa Social Amelioration Program alang sa mga benepisyaryo niini sa Rehiyon 12.
Sumala ni Dominggo nga sa karon anaa na sa 2,100 ka pamilya ang nakadawat sa maong hinabang diin mukabat na sa 10,500,000 pesos ang kinatibuk-ang kantidad sa nahatag.
Equivalent matud pa kini sa singko mil pesos nga nadawat sa matag pamilya.
Gipaklaro usab ni Dominggo nga gawas sa 2,100 ka pamilya nga nakadawat subay sa listahan sa DSWD 12 duna pay nadugang nga mga nahatagan kagahapon nga wala pa mareport sa ilang buhatan og kini madungag na usab sa listahan sa mga unang nakadawat.
Pipila sa mga LGU nga nakasugod na sa pag-apud-apod sa programa mao ang syudad sa Tacurong, munisipyo sa Lambayong og Esperanza sa Sultan Kudarat, ug ang munisipyo sa Banga sa South Cotabato.
Gibutyag usab ni Dennis Dominggo nga mukabat sa 953,873 ka mga pamilya ang target sa DSWD nga makadawat sa nasampit nga kantidad apil na niini ang mga miembro sa 4P’s.
Gitin-aw ni Dominggo nga sa higayon nga duna nay memorandum of agreement ang usa ka lokal nga kagamhanan tali sa DSWD, mahimo na nga sugdan sa LGU ang pag-apud-apod niini.
Gani sa nakalaby nga semana pa nahatag na matud pa sa DSWD ang mga social amelioration card ngadto sa LGU alang sa pag-imprenta.(Jordan Britos)
