Davao City – Walay extension o additional beneficiaries sa Pantawid Pamilyang Pilipino Program (4Ps) kun ang Conditional Cash Transfer (CCT) anti-poverty alleviation scheme sa Department of Social Welfare and Development (DSWD) karong tuiga.
Kini maoy gipamahayag ni DSWD information officer Flora Mae Espada sa pakighinabi kaniya sa tulumanong ‘Straight to the Point’.
Gipasabot ni Espada nga ang focus sa pagkakaron sa DSWD mao ang pagkumusta ngadto sa aktwal nga estado o development sa mga benepisyaryo sa 4Ps sugod niadtong 2008 hangtud karong tuiga diin gitawag nila kining ‘Kumustahan’.
Segun sa DSWD, ang mga benepisyaryo nga makonsidera na nga ‘self-sufficient’ pwede na nilang i-graduate gikan sa programa una pa sila modugang og bag-ong benepisyaryo.
Base sa datos sa DSWD, adunay 4.3 milyon ka mga benipisyaryo sa tibuok Pilipinas diin 260,939 kanila taga-Region XI.
Sa maong gidaghanon, kapin 29,000 niini anaa ubos sa gitawag nga Modified Conditional Cash Transfer (CCT) alang sa ‘indigenous communities’ nga naggikan sa mga malagyong dapit kun ‘isolated areas.’
RadyoMaN Jason Amisola
