Davao City – Magpahigayon karon nga tuig ang Department of Social Welfare and Development (DSWD) og house to house assessment alang sa poverty reduction programs sa gobyerno diin usa na dinhi ang Pantawid Pamilyang Pilipino Program (4Ps).
Sa pakighinabi sa DXDC RMN Davao kang Merlinda A. Paragamac, Promotive Services Division Chief sa DSWD-XI, gidasig niini ang katawhan nga magpa interview sa DSWD diin mao kini ang unang lakang aron masuta kung kwalipikado kining mahilakip sa programa.
“This year, naa tay another round of house to house nga assessment. So akong gihangyo gyud nga magpa apil gyud. Dili masuko kung adunay mag interview. Ang uban man gud masuko unya pag-abot diay sa panahon, sila diay tong magreklamo kay wala sila naapil,” saysay ni Paragamac.
Nasayran nga matag tulo ka tuig ginabuhat sa departamento ang maong house to house assessment. Sa pagkakaron, wala pay eksaktong schedule ang nahisgutang assessment.
RadyoMaN Kirby Manzon
