Davao City – Gipaklaro karon sa Department of Social Welfare and Development (DSWD) nga walay Indian national diri sa Davao region nga nahilakip sa Pantawid Pamilyang Pilipino Program (4Ps).
Sa pakighinabi sa DXDC RMN Davao kang Florame Espada, Infomation Officer sa DSWD-XI, gibutyag niini nga wala silay natala nga Indian national nga naapil sa nahisgutang programa dinhi sa rehiyon.
“Wala pa mi na note nga Indians ang atong Pantawid Pamilya. And ever man naa, gina-verify man gud nato kung unsa gyud ang ilang status,” saysay ni Espada.
Gipasabot ni Espada nga coverage sa 4Ps mao ang mga Filipino citizens gawas na lamang sa mga sitwasyon nga maminyo ang usa ka Pilipino sa usa ka langyaw ug kwalipikado kini sa criteria sa DSWD sama sa Balut Island, Sarangani Province nga adunay babaye nga nakapangasawa og Indonesian apan miyembro na kining daan sa 4Ps.
Nasayran nga gikatakdang magpahigayon na usab og house-to-house assessment ang DSWD alang sa poverty reduction program sa gobyerno diin apil na niini ang 4Ps.
RadyoMaN Kirby Manzon
