Davao City- Pasado ang 39 ka mga tindahan nga gimonitor ug na-inspect na sa Department of Trade and Industry kun DTI XI nga adunay ginapamaligyang christmas lights ug uban pang dekorasyon karong pasko.
Segun ni Welza Gazo, Trade Industry Development Specialist DTI XI- Consumer Protection Division nga nagpadayon ang ilang pagsuroy sa tanang mga establisimiento dinhi sa rehiyon.
Subay niini nagpahimangno ang DTI XI ngadto sa publiko nga seguraduhong walay depekto ang gamitong christmas lights.
Ang christmas lights adunay lima ka tuig lamang nga validity apan kung nakita nga duna kiniy daot ilabina sa iyang wire dili nalamang kini gamiton aron makalikay sa sunog.
“Palita ang christmas lights nga adunay ICC markings kay niagi kinig quality control busa makasegurong dili kini delikado nga gamiton,” segun ni Gazo.
Matud ni Gazo kung adunay depekto ang napalit nga christmas light mamahimo kining pakambyuan kung asa napalit nga tindahan ang maong produkto o mamahimong i-report usab kini sa ilang buhatan sa numerong 2240511 loc 417.
RadyoMan Aimee Guinita
