Davao City – Mi-apela karon ang Department of Trade and Industry (DTI) sa mga retailers nga limitahan usab ang pagbaligya sa mga basic commodities sama sa sardinas, noodles ug uban pa.
Sa interbyu sa DXDC RMN Davao kang Belinda Ambi, Regional Director sa DTI-XI, gibutyag niini nga kini aron malikayan ang ‘artificial shortage’ diin namonitor sumala pa ang ‘panic buying’ dili lamang sa mga alcohol ug disinfectant kundili lakip na usab sa ubang mga produkto.
“Nag-isyu nalang pud mi atong regulation sa mga retailers sa pagbaligya kay gina-anticipate pud namo nga naay mga mamakyaw og sardinas, noodles,” saysay ni Ambi.
Gipasabot ni Ambi nga kini nga lakang gihimo aron makapalit sab ang ubang konsumante ug dili lamang mapahimuslan niadtong adunay kaya sa pinansyal.
“Dili na sila pwede muhatag og daghan gyud kaayo kay otherwise naa gyud toy madehado kay wala lagi sila poy ikapalit og bulk,” tataw ni Ambi.
Gipasabot sa DTI nga walay rason nga mag ‘panic buying’ diin gipaniguro sa departamento nga adunay igong suplay sa mga produkto bisan og mo-grabe ang sitwasyon sa COVID-19.
RadyoMaN Kirby Manzon
