Davao City – Walay pag-usbaw kun pagtaas sa presyo sa mga nag-unang palaliton dinhi sa Davao Region.
Sa interbyu sa DXDC RMN Davao kang Dexter Bermudez, Senior Trade and Industry Development Specialist sa Department of Trade and Industry (DTI)-XI, Consumer Protection Division, gibutyag niini nga ‘stable’ gihapon ang presyo sa mga nag-unang palaliton tungod kay ‘stable’ usab ang suplay sa maong mga produkto.
“Stable man ang price kay stable man ang supply (sa basic necessities). Naa poy ipagawas na data sa Suggested Retail Price (SRP) 2021. So, within sa SRP gihapon ang mga establishments,” saysay ni Bermudez.
Gipaniguro ni Bermudez nga kung aduna man silay mamonitor nga makalapas sa DTI regulations labi na sa SRP, ilaha kining isyuhan og ‘letter of inquiry’ aron kini mapatubag bisan sa gamay’ng usbaw sa presyo ug kini gilayong maaksyonan.
Samtang, laumang sa Oktubre o Nobyembre mahibal-an ang price list sa Noche Buena products diin kini mamahimo usab nga ma-access pinaagi sa “e-Presyo” ang Online Price Monitoring System (OPMS) sa DTI kung asa makita sa konsumante ang updated prices sa basic necessities lakip na ang prime commodities.
RadyoMaN Kirby Manzon
