Un persona ya muri despues ya queda bacul adentro del su casa que ya man uput na fuego enantes tarde na Narra Drive, Tugbungan.
El victima amo si Jimmy Salian, quien alegaomente enfermo.
Na report del pulis y bumbero, el quema ya sosede serca man alas 3 del tarde donde dayun ya responde el bumbero y maga pulis.
Dayun tambien ya puede controla con el fuego y nohay mas este man calayat pa otro maga casa na mencionao lugar.
Al nieta di Salian, un 5-año bata mojer ya puede entabla pa afuera mientras si Salian nohay mas puede sale porcausa su enfermedad y ya sigui este quema na fuego.
Despues ya declara el maga bumbero “fireout” ya puede tambien encontra con el quemao cuerpo di Salian na fuerta para na cusina, ta indica ya precura pa este sale pa atras pero nohay mas le guinda pa afuera hasta ya embolbe conele el fuego. Maga imbestigator del bumbero y pulis ta precura pa sabe si cosa el causa del quema.
