Dipolog City- Sa dili madugay mas modako ug mas maanindot na ang dagway sa Dipolog City Hall building.
Gisugdan na sa kagamhanang lokal sa Dipolog sa pagpangulo ni Mayor Darel Dexter T. Uy ang pag tukod ug 4 ka andana nga city hall building nga nahimutang sa Bonifacio Street corner Gonzales ug Herrera Streets ug tapad sa kasamtangang nagbarog nga city hall annex.
Nasayran kang City Planning and Development Office Coordinator Engr. Albert Alimpulos nga kun mahuman na ang nasangpit nga edipisyo isunod usab dayon sa pagtrabaho o pag renovate ang karaang city hall building nga nag-atubang sa Rizal Avenue.
Matud pa ni Mayor Uy nga dinhi sa main building ipahimutang unya ang city museum ug ang city library alang sa mga Dipolognon ug sa mga bisita sa dakbayan .
Kahinumduman nga ang plano sa pagtukod ug pagpalambo sa city hall building mipailawom sa makuting konsultasyon sa mga Dipolognon pinaagi sa pagpahigayon ug public hearing, stakeholders’ meetings ug uban pa.
Mikonsulta usab ang dakbayan sa National Historical Commission of the Philippines alang sa nasangpit nga proyekto dugang pa n Engr. Alimpulos.
Lakip sa proyekto nga nagkantidad ug P128, 892,868.57 ang pagbuhat ug mga covered pathways, drainage system , parking space ug uban pang mga amenities sa lugar.
Sa susamang kalamboan nagpadayon usab karon ang renovation ug improvement ang Plaza Magsaysay nga nahimutang atbang ra usab sa city hall building ning dakbayan. Ang proyekto gitakda nga motapos karong Pebrero 2019. (CIO/ebp).
Photo(c)CIO
