Davao City – Giduso karon sa Alliance of Concerned Teachers (ACT) ngadto sa lokal nga konseho ang dugang subsidiya sa tanang magtutudlo sa dakbayan sa Davao.
Sa privilege speech ni Davao City Councilor Pilar Braga gibutyag niini nga nagpadala ang ACT og sulat kaniya aron ipaabot ang kahimtang sa mga magtutudlo ilabi na karon sa nagpadayong urbanisasyon sa syudad.
Unod sa maong sulat ang paghangyo sa mga magtutudlo nga magbuhat og City Ordinance bahin sa dugang P2,000 local monthly allowance ug P2,500 quarterly rice subsidy sa tanang personahe sa Department of Education (DEPED) nga mag gikan sa pondo sa lokal nga kagamhanan.
Tungod niini, gipasabot ni 2nd District Councilor Danilo Dayanghirang ngadto sa mga magtutudlo nga manginahanglan og P240 million budget matag tuig ang kagamhanan diin wala pay labot dinhi ang rice subsidy ug ang laing ginagahinan og pondo sama sa Lingap, Police Auxillaries ug street lighting facilities.
Dugang ni Dayanghirang nga anaa sa mga magtutudlo ang simpatiya ug suporta niini apan giklaro nga sa ehekutibo kun kang Davao City Mayor Sara Duterte-Carpio ang desisyon sa pag-alokar og dugang subsidiya ngadto kanila.
Sa interbyu kang ACT-Davao City Chapter President Reynaldo Pardillo, gitataw niini nga dako’g ikatabang ang dugang sabsidiya sa umaabot nga panahon ilabi na sa matag-adlaw nga panginahanglanon.
Sa kasamtangan, anaa sa kapin P19,000 ang sahod public school teachers nga adunay kapin P17,000 nga take home pay.
“Base sa datos sa NEDA, kung mamahimo, aron magkadisente nga panginabuhi kinahanglan ang magtutudlo makadawat og P42-mil matag bulan, gani kulang kini kun itandi sa suholan sa mga teachers karon,” segun niini.
Sa karon, plano na magbuhat og resolusyon si Councilor Braga bahin niini apan wala kini plano maghatag og ‘false hope’ sa mga magtutudlo.
RadyoMaN Jason Amisola
