Davao City – Gilantaw sa lokal nga panggamhanan sa Davao City ang pagmontar pa og mga dugang vaccination hubs sa nagpadayong ‘Bakuna nights’.
Sa interbyu sa RMN Davao kang Dr. Josephine Villafuerte, head sa Davao City’s Vaccination Cluster, gatusan ka mga vaccinees ang nisalmot sa maong programa.
Sumala niini, sukad sa pag-arangkada sa ‘Bakuna night’ kapin 200 ka mga indibidwal ang nabakunahan sa 1st dose kada gabie.
Segun ni Villafuerte, padayon nilang giestudyuhan ang nasangpit nga stratehiya aron sa tinguha sa paspas nga pagkab-ot sa herd immunity.
Sa kasamtangan, adunay duha ka areas nga gitagana alang sa ‘Bakuna nights’ nga mao ang San Roque Elementary School ug sa Davao Recreational Center.
Planong magbutang og vaccination sites sa Distrito 2 ug 3 aron maakomodar ang mga interesado nga mga magpabakuna ilabina kadtong mga dili makapabakuna sa adlawan tungod sa ilahang mga schedule.
Gibutyag ni Villafuerte, anaa na sa 60% sa populasyon sa Davao City ang vaccinated na kontra COVID-19.
RadyoMaN Aimee Guinita
