Davao City – Duha ka mga babaye ang midangop sa kwerpo sa kapulisan human gipangkawatan sulod sa ilang panimalay.
Unang biktima mao si Estrella Cahicog, 68 anyos, retired teacher, residente sa may Brgy. 22-C Piapi Boulevard siyudad sa Davao.
Sumala sa report sa Sta. Ana PNP, alas 3:30 sa kadlawon nakamata ang biktima ug nadiskubrehan nga nahanaw na ang iyang sling bag nga dunay sulod nga kwarta nga mokantidad og P15,000 ug duha ka mga cellphone nga mokantidad og P18,000 ug P46,000.
Saysay pa sa biktima ngadto sa kapolisan nga nakalimot og tranka sa purtahan diin nagtoo ang biktima nga gisulod sa wala mailhing kawatan atol sa pagkahinanok sa biktima niadtong tungora.
Sa pikas bahin sa Tugbok PNP, nidangop si Joy Lie Landero Besas, 27 anyos, self-employed ug residente sa Bago Oshiro gumikan nakadawat kini og text gikan sa iyang igsoon samtanag anaa kini sa Tagum City nga gilungkab iyang panimalay.
Sa mao nga impormasyon, dali siyang mi-uli ug didto nasayran nga nahanaw na iyang flat screen TV, DVD player, rice cooker ug uban pang gamit nga mokabat sa dol-an P10,000.
Gidugang sa complainant nga wala say tawo sa ilang panimalay rason nga kursonada kaayo ang kawatan nga mosulod ug simpleng gisakmit iyang mga gamit.
Ang mga biktima daling nagpatabang sa kapulisan alang sa imbestigasyon ug sa posibleng pagkasikop sa mga suspetsado.
RadyoMaN Don Pulayao / RadyoMaN Paul Canono
