Ginpasakaan sang kaso sang Criminal Investigation and Detection Group ukon CIDG ang duha ka opisyal kag isa ka staff sang Barangay Alegre, Oton, Iloilo bangud sa anomaliya sa pagpanagtag sang financial assistance sa idalum sang Social Amelioration Program ukon SAP sang gobyerno may kaangtanan sa COVID-19 pandemic. Ang mga ginpasakaan sang kaso amo sanday Punong Barangay Pedro Panique, Barangay kagawad Riza Cruz kag staff nga si Joan Nombreda , lunsay pumuluyo sang nasambit nga lugar. Kalakip sa kaso sang ginpasaka sang CIDG sa Iloilo Provincial Prosecutor’s office batuk sa mga natungdan amo ang violation sa RA 3019 ukon Anti-graft and Corrupt Practices Act kag RA 11469 ukon Bayanihan to Heal as One act . Magluwas diri, ginpasaka man ang kaso batuk sa ila angut sa paglapas sa RA 6713 ukon Code of Ethical Standards of Public Officials sa Office of the Ombudsman. Ginreklamo sang pila ka pumuluyo ang nasambit nga mga opisyal sa CIDG bangud sa pagmanipular sa listahan sang SAP beneficiaries kon sa diin ginlakip nila ang mga indi kuwalipikado nga makabaton santu sa guidelines sang DSWD.
