Davao City – Dul-an P50,000 ang kantidad sa mga butang nga natangag sa wala mailhing suspetsado human gilungkab ang duha ka lawak nga girentahan sa duha ka boarders natigayon sa Garcia Heights, Bacaca Road, Bajada siyudad sa Davao.
Sa report gikan San Pedro PNP, unang nabiktima sa paglungkab mao si Marivic Madaje, 21-anyos, netibo nga taga Mabuhay, Makilala, North Cotabato, diin sumala pa alas-7:00 kagabie nadiskubrehan sa biktima nga gipugos ug abri ang purtahan sa iyang kuwarto ug nahanaw na ang iyang laptop lakip ang charger, gold necklace, ug mga sinsilyo diin mokabat tanan sa kapin P27,000 nga kantidad.
Samtang ikaduhang nabiktima sa paglungkab mao si Mary Jane Dolirican, 29-anyos, netibo nga taga Bgry. Cabul-an, Capoocan Leyte ug kasamtangan nagrenta sa maong lugar diin matud pa alas-7:37 usab kagabie iya nalang namatikdan nga gipugos og sulod ang iyang kuwarto diin natangag ang usa ka bluetooth speaker, usa ka silver ug gold nga singsing ug cash nga mobalor tanan sa kapin P18,000.
Ang duha ka mga biktima igo nalang sa pagdangop sa San Pedro PNP aron usab nila pa imbestigahan ang nahitabong paglungkab sa duha ka lawak nga ilang girentahan.
Sa karon ang kaso giduso na sa Investigation Section San Pedro PNP.
RadyoMaN Don Pulayao
