Midsalip, Zamboanga del Sur – Gitulis sa tulo ka wala mailhing mga lalaki ang duha ka mga collector sa usa ka credit cooperative alas 11:45 sa buntag kagahapong adlawa sa Barangay Canipay Sur, lungsod sa Midsalip, niining probinsya.
Ang mga biktima giilang sila si Melvin Gadjali Daud, 23 anyos, ulitawo, collector sa ASA Philippine Credit Cooperative ug kasamtangang nagpuyo sa Purok Curbada, Poblacion A, Midsalip ZDS ug si Cristituto Bangquiao Atis Jr, 36 anyos, minyo ug residente sa Purok 2-A, Barangay Sigapod, Midsalip ZDS.
Sa imbestigasyon sa kapulisan nasayran nga ang mga biktima ang nagbyahe sakay sa single motor gikan sa Barangay Sigapod apan sa pag-abot sa Barangay Canipay Sur, Midsalip , matud pa 3 ka wala mailhi ug armadong mga lalaki ang miharang kanila.
Daling gitionan ang duha ka mga biktima sa duha ka mga suspek ug mideklarang hold-up samtang ang usa ka suspetsado ang pwersahang mibira sa packbag ni Melvin Daud lakip na ang gimaneho niini nga XRM 125 single MC color pula ug puti nga nagtangag sa temporary plate number 1001-00000393945, ug rehistrado ubos sa pangalan sa ASA PHILIPPINES CREDIT COOPERATIVE.
Usa sa mga suspetsado mipabuto sa armas sa makadaghang higayon ug daling misibat paingon ngadto sa lungsod sa Dumingag.
Kasamtangan na nga nagpahigayon ug follow up investigation ang kapulisan sa Midsalip arun sa pag-ila ug pagsikop sa mga suspetsado nga responsable sa maong pagpanulis.
